काठमाडौँ । ताप्लेजुङको पाथीभरा मन्दिर पुग्न निर्माण हुन लागेको केबलकारको विपक्षमा रहेका आन्दोलनरत पक्षसँग गृहमन्त्री रमेश लेखकले नै बार्ता गर्ने भएका छन् ।
नो केवुलकार अभियानको नाममा आन्दोलन चर्किएपछि एमाले नेता योगेश भट्टराईको पहलमा सोमवार गृहमन्त्री लेखकसँग बार्ता तय भएको हो ।
भट्टराईले नै सामाजिक सञ्जालमार्फत बार्ता हुन लागेको जानकारी दिएका हुन् । उनले सामाजिक सञ्जाल फेसबुकमा लेखेका छन्, ‘वहाँहरूले माननीय गृह मन्त्रीज्यू समक्ष भेटेर आफ्ना कुरा राख्न चाहनु भएको र त्यसको समन्वयका लागि मलाई अनुरोध गर्नु भए अनुरूप मैले गृह मन्त्रीज्यूलाई अनुरोध गरें । माननीय गृह मन्त्रीज्यूले भोलि माघ २८ गते साँझ ६ बजे भेटघाटको समय दिनुभएको जानकारी गराउँदछु ।’
आन्दोलनरत पक्षलाई सरकारले तोकेको वार्ता समितिसँग छलफललाई निरन्तरता दिएर वार्ता मार्फत समस्याको समाधान गर्न समेत उनले अनुरोध गरेका छन् ।
आन्दोलनरत पक्ष र सरकारका प्रतिनिधिबीच आज तय भएको वार्ता भाँडिएको थियो । आन्दोलनरत पक्षले राजनीतिक विवाद भएकाले आफूहरु मन्त्रीस्तरीय या उच्च राजनीतिक संयन्त्रसँगमात्रै वार्ता बस्ने अडान राख्दै आएका छन् । उनीहरुले आज पत्रकार सम्मेलन गरेर मन्त्रीस्तरीय वार्ता नभए भोलिबाट आन्दोलन शसक्त पार्ने घोषणा गरिसकेका छन् ।
