काठमाडौँ । सिन्धुपाल्चोकको भुम्लु गाउँपालिकाले गुन्द्रुक बनाएर बेच्ने भएको छ । इलामको रोङ गाउँपालिकाले गुन्द्रुक बनाएर आफ्नै ब्राण्डिङसहित बेचविखन गरिरहेको छ । रोङको यो आइडियालाई पछ्याउँदै भुम्लु गाउँपालिकाले गुन्द्रुक बनाउने प्रक्रिया थालेको जनाएको छ ।
गाउँपालिकाले कृषकहरुबाट प्रतिकेजी २५ रुपैयाँमा साग खरिद गरेर गुन्द्रुक बनाउने योजना अघि सारेको प्रमुख प्रशासकीय अधिकृत कृष्णबहादुर खत्रीले जानकारी दिए ।
खत्रीका अनुसार गाउँपालिकालाई समृद्ध बनाउने अभियान अन्तरगत गुन्द्रक बनाउने अभियान थालिएको हो ।
भुम्लुमा उत्पादित साग स्थानीय बजारमा खपत नहुने र दोलालघाट तथा जिल्लाको अन्य बजारमा लैजाँदा महङ्गो भाडा पर्ने भएपछि गाउँपपालिकाले खरिद गर्ने भएको हो ।
खत्रीका अनुसार आफुसँग हाल रहेको साग तथा प्रतिबर्ष कति उत्पादन गर्न सकिने परिणामसहित गाउँपालिकाको कृषि विकास शाखामा जानकारी गराउन स्थानीय किसानलाई अनुरोध गरेको हो ।
मण्डनदेउपुर नगरपालिकाको १५औं अविधेशनको दोस्रो नगरसभा बैठकले मोहीको ब्राण्डिङ गर्ने विशेष प्रस्ताव पारित गरेर मोही ब्रान्डिङ गर्ने प्रक्रिया थालेको छ ।
बहुराष्ट्रिय कम्पनीले उत्पादन गरेको पेय पदार्थको सेवन नगर्ने अठोटका साथ स्थानीय उत्पादन मोहीको ब्राण्डिङ गरी मोही–प्रबद्र्धन गर्न लागिएको हो । नगरमा दूध पर्याप्त उत्पादन हुने भएकाले नगरसभाबाटै विशेष प्रस्ताव पारित गरी स्थानीय किसानले उत्पादन गरेको दूधबाट मोही बनाएर खाँदा र खुवाउँदा स्वच्छ भइने नगर प्रमुख टोकबहादुर वाईबा बताएछन् ।
मोहीको ब्यवसायिक उत्पादन थालेपछि मागको आधारमा लेबल लगाएर बजारमा लगिने छ । नगरमा उत्पादन भएको दूध दैनिक ३५ देखि ४० हजार पालिकाबाहिर खपत हुनेगरेको छ । यसलाई पालिकाभित्रै मही बनाएर बेच्ने अभियानमा पालिका छ ।
