काठमाडौँ । देशको संघीय राजधानी पनि रहेको काठमाडौँ महानगरपालिकाको स्थानीय तह संस्थागत क्षमता स्वमूल्यांकन (लिजा) को विवरण सार्वजनिक भएको छ ।

स्थानीय तहहरु आफैले आफैलाई नम्बर दिएर मूल्यांकन गर्ने लिजामा काठमाडौँ महानगरले आफैलाई १०० मा ८१.३४ प्रतिशत अंक दिएको छ ।

लिजामा १० वटा सुचक छन् । यी सुचकको विभिन्न अंकभार दिइएको छ । यसमध्ये काठमाडौँ महानगरले आफूलाई शासकीय प्रबन्धमा आफू सबै सुचकभन्दा अब्बल रहेको भनेर बढी प्रतिशत अंक दिएको छ ।

संघीय मामिला तथा सामान्य प्रशासन मन्त्रालयले दिएको जानकारी अनुसार काठमाडौँ महानगरले शासकीय प्रबन्धमा ९२.५१ प्रतिशत अंक दिएको छ । यस्तै, संगठन तथा प्रशासनमा ८९.०३ प्रतिशत, वार्षिक बजेट तथा योजना व्यवस्थानमा ८२.३१ प्रतिशत र वित्तीय एवम् आर्थिक व्यवस्थापन सुचकमा ८७ प्रतिशत अंक दिएको छ ।

काठमाडौँ महानगरले आफूलाई सेवा प्रवाहमा ८७.५५ प्रतिशत अंक दिएको छ भने न्यायिक कार्य सम्पादनमा ९१.२७ प्रतिशत अंक दिएको छ । यस्तै, भौतिक पूर्वाधारमा ६८.१६ प्रतिशत, सामाजिक समावेशीकरणमा ७९.०९ प्रतिशत, वातावरण संरक्षण तथा विपद व्यवस्थापनमा ६८.२७ प्रतिशत र सहकार्य र समन्वयमा ६६ प्रतिशत अंक दिएको छ ।