काठमाडौँ । उच्च अदालत जनकपुरले धनुषाको विदेह नगरपालिकाका प्रमुख प्रशासकीय अधिकृत दिपेन्द्र कुमार साहलार्ई कार्यालय हाजिर गराउन नरोक्न र सहज रुपमा कार्यालयमा काम गर्ने बातावरण मिलाउन आदेश दिएको छ ।
विदेह नगरपालिकाका मेयर र बेचन दासले कार्यालय प्रवेशमा अवरोध गरेको र कार्यालय प्रवेशमा प्रहरीले सहयोग नगरेको भन्दै साहले उच्च अदालत जनकपुरमा रिट दायर गरेका थिए ।
सो रिटको सुनुवाई गर्दै उच्च अदालत जनकपुरका न्यायाधीश खेमराज भट्टको इजलासले १३ फागनुसम्मका लागि निमित्त प्रमुख प्रशासकीय अधिकृतका रुपमा कामकाजमा अवरोध नगर्न भनेको हो ।
साहले गत २ फागुनमा विदेहको निमित्त प्रमुख प्रशासकीय अधिृकतको जिम्मेवारी पाएका थिए । निमित्तको हैसियतमा कार्यरत साहलाई २८ फागुनमा नगरप्रमुख दासका छोराले हातपात गरेका थिए ।
सो हातपात भएकै दिन साहले नगरपाकिलाका ८० भन्दा बढी कर्मचारीलाइ स्पष्टीकरण सोध्ने, बर्खास्त गर्ने तह वृद्धि रोक्का राख्ने, नियुक्ति बदर गर्ने लगायतका काम गरेका थिए । यो प्रकरणमा विवाद वढ्दै गएपछि साहलाई नगरपालिकामा हाजिर हुन दिइएको थिएन ।
हाजिर गर्न नदिएपछि जिल्ला प्रशासन कार्यालय पुगेका साहलाई प्रमुख जिल्ला अधिकारीले ४ दिनसम्म कार्यालयमा उपस्थित भएर काम गर्न वातावरण नबनाइदिएपछि साहले उच्च अदालतमा रिट दायर गरेका थिए ।
रिटमा अन्तरकालीन आदेश भएलगत्तै साहले आइतवार नगरपालिकामा हाजिर हुन जाने साहले बताएका छन् । विवाद भइरहेका बेला संघीय मामिला तथा सामान्य प्रशासन मन्त्रालयले विदेहको प्रमुख प्रशासकीय अधिकृतका रुपमा उपसचिव मोहन कुमार श्रेष्ठलाई खटाइसकेको छ ।
मन्त्रालयले प्रमुख प्रशासकीय अधिकृतका रुपमा खटाइएपछि निमित्तको जिम्मेवारी पाएका साहले भने आफु साविकको इन्जिनियरका रुपमा पनि अदालतको आदेश अनुसार पालिकामा हाजिर हुने बताएका छन् ।
