काठमाडौँ । इलामको सूर्योदय नगरपालिकाले पालिकामै राष्ट्रिय परिचयपत्रको बनाउन पाउने गरी सुविधा विस्तार गरेको छ । यो सुविधासँगै अब नगरपालिकामै फाराम भर्ने र तस्बिर खिचाउन पाइनेछ ।
हाल यो सेवा जिल्ला सदरमुकाममा मात्र थियो । राष्ट्रिय परिचयपत्र तथा पञ्जीकरण विभाग र सूर्योदय नगरपालिकाबीच राष्ट्रिय परिचयपत्र वितरण अस्थायी स्टेसन स्थापना गर्नेसम्बन्धी समझदारीपत्रमा हस्ताक्षर भएको छ । विभागका महानिर्देशक युवराज कट्टेल र मेयर रणबहादुर राईले समझदारीपत्रमा हस्ताक्षर गरेका छन् ।
‘करिब १० महिनाको निरन्तर प्रयासपछि यो सेवा नगरमा आएको छ,’ उनले भने, ‘यसका लागि विभाग, इलामस्थित जिल्ला प्रशासन कार्यालयलगायतले सहयोग गर्नुभएको छ,’ मेयर राइले भने । अहिले प्रशासन कार्यालयमा दिनहुँ एक सय जनाले परिचयपत्रका लागि फाराम भरिरहेका छन् ।
प्रशासनमा गत मङ्सिर सम्ममा फाराम भरेका २६ हजार जनाको परिचयपत्र कार्यालयमा आइसकेको र १० हजार जति वितरण भइसकेको सिडिओ कल्पना श्रेष्ठले जानकारी दिइन् ।उनका अनुसार कार्यालयमा आएको करिब १६ हजार कार्ड वितरण हुन सकेको छैन । अहिले बैङ्क खाता खोल्नेदेखि विभिन्न काममा राष्ट्रिय परिचयपत्र वा त्यसको नम्बर अनिवार्य छ ।
