काठमाडौँ । पर्वतको जलजला गाउँपालिकाले अन्तरजातीय विवाह गर्ने जोडीलाई सम्मान तथा पुरस्कृत गर्ने भएको छ । 

अन्तरजातीय विवाहलाई प्रोत्साहन गर्न भन्दै गाउँपालिकाले यस्ता जोडीलाई सम्मान गर्ने नीति लिएको छ । पालिकाको नीति तथा कार्यक्रममा उल्लेख कार्यक्रमअनुसार पालिकाले अन्तरजातीय विवाह गर्ने जोडीलाई पालिकामा सम्पर्क गर्न भनेको छ । 

पालिकामा दलीत समुदाय र गैर दलीत समुदायबीच विवाह गर्ने गर्ने २० जोडी जति रहेको अनौपचारिक तथ्यांक भए पनि हालसम्म १२ जोडीले मात्रै पालिकामा सम्पर्क राखेको पालिका अध्यक्षको सचिवालयमा कार्यरत साजन परियारले जानकारी दिए । 

पालिकाले यसअघि पनि अन्तरजातिय विवाह गर्नेलाई सम्मान गर्नेभन्दै सम्पर्कमा आउन सुचना जारी गरेको थिथयो । तर न्युन जोडीले मात्र सम्पर्क गरेका कारण आगामी चैतको पहिलो साता आयोजना गर्ने सम्मान कार्यक्रमका लागि पुन सम्पर्कमा आउन भन्दै सूचना जारी गरिएको हो । 

यस्ता जोडीले विवाह दर्ताको प्रमाणपत्र र दुबैजनाको नागरिकताको प्रतिलिपि  पेश गर्नुपर्नेछ भने जलजला गाउँपालिकामा बसोबास भएको प्रमाण ल्याउनुपर्ने बताइएको छ ।