भक्तपुर । जिल्लास्तरीय राष्ट्रपति रनिङ शिल्डको उपाधि भक्तपुर नगरपालिकाले तेस्रो पटक जितेको छ । भक्तपुर जिल्ला खेलकुद विकास समितिको आयोजनामा सम्पन्न १३औँ राष्ट्रपति रनिङ शिल्डमा नगरपालिकाले ३७ स्वर्ण, १९ रजत र ३८ कास्यसहित ९४ पदकसहित उपाधि जितेको हो ।
भक्तपुर नगरपालिकाले यसअघि २०७९ मा सम्पन्न ११औँ र २०८० मा सम्पन्न १२औँ राष्ट्रपति रनिङ शिल्डको उपाधि जितेको थियो । प्रतियोगितामा मध्यपुर थिमि नगरपालिका १५ स्वर्ण, १९ रजत र ३० कास्यसहित ६८ पदक जित्दै दोस्रो भयो भने चाँगुनारायण नगरपालिका १२ स्वर्ण, २५ रजत र १८ कास्यका साथ तेस्रो भयो ।
प्रतियोगितामा कराते, भलिबल, कबड्डी, उसु, तेक्वान्डो र एथ्लेटिक्स गरी ६ वटा खेलमा प्रतिस्पर्धा भएको थियो । भक्तपुर नगरपालिकाले उसुमा ५ स्वर्ण, ६ वटा रजत र १० कास्य जितेको छ । त्यसैगरी भलिबल खेलको महिला र पुरुष दुवैमा स्वर्ण पदक भक्तपुर नगरपालिकाले जितेको छ ।
एथ्लेटिक्समा भक्तपुर नगरपालिकाले १३ स्वर्ण, ६ रजत र ८ कास्यपदक जित्यो । त्यसैगरी तेक्वान्दोमा १० स्वर्ण, ४ रजत र ११ कास्य, कबड्डीको महिला र पुरुष दुवै खेलको स्वर्ण, एउटा रजत र ३ कास्य पदक भक्तपुर नगरपालिकाले जितेको छ ।
प्रतियोगिताको अन्तिम दिन चाँगुनारायण नगरपालिकामा भएको कराते खेलमा ५ स्वर्ण, २ रजत र ६ कास्य भक्तपुर नगरपालिकाले जितेको छ ।
मध्यपुर थिमि नगरपालिकाले उसुमा २ स्वर्ण, २ रजत, २ कास्य, भलिबलमा २ रजत, २ कास्य, तेक्वान्दोमा एउटा स्वर्ण ४ रजत, ७ कास्य, एथ्लेटिक्समा ९ स्वर्ण, ७ रजत, ८ कास्य, कबड्डीमा १ रजत, १ कास्य र करातेमा ३ स्वर्ण, ३ रजत र १० कास्य पदक जितेको छ ।
प्रतियोगितामा तेस्रो भएको चाँगुनारायणले उसुमा ५ स्वर्ण, ४ रजत, ३ कास्य, तेक्वान्दोमा एउटा स्वर्ण, ४ रजत, ६ वटा कास्य, एथ्लेटिक्समा २ स्वर्ण १० रजत, ६ कास्य र करातेमा ४ स्वर्ण, ७ रजत, ३ कास्य पदक जितेको छ ।
