काठमाडौँ । कार्यान्वयनमा ल्याइएका अनलाइन सेवा प्रणाली सञ्चालनको निरीक्षण र सहजीकरणका लागि काठमाडौँ महानगरपालिकाअन्तर्गतका प्रशासन विभाग र सूचना प्रविधि विभागका अधिकारीहरु वडा वडामा पुगेका छन् ।
मंगलबार थालिएको यो कामका क्रममा वडा नं. १६, १ र २६ मा प्रणाली सञ्चालन हेरिएको थियो । यस क्रममा प्रणाली सुधार तथा प्रभावकारी कार्यान्वयनका लागि जनप्रतिनिधि र प्रणाली चलाउने कर्मचारीहरुका अपेक्षा र आवश्यकता टिपोट गरिएको थियो ।
आफैँले निर्माण गरेका, संघ सरकार र अन्तर्गतका कार्यालयले कार्यान्वयन ल्याएका ३२ वटा प्रणाली महानगरपालिकामा सञ्चालित छन् ।
पछिल्लो पटक जिल्ला प्रशासन कार्यालय काठमाडौँमार्फत केन्द्रीय नागरिकता व्यवस्थापन प्रणाली (सिसिआइएमएस) कार्यान्वयनमा ल्याइएको छ । फागुनको अन्तिम साता वडा सचिवहरुलाई तालिम दिएर प्रणाली कार्यान्वयनमा ल्याएपछि यसलाई पूर्ण सञ्चालन गर्न वडाको तत्परता, तयारी र व्यवस्थापन बुझ्न, समस्या परेको भए सहजीकरण गरिदिन वडा निरीक्षण थालिएको प्रशासन विभागका प्रमुख ध्रुवकुमार काफ्लेले जानकारी दिए ।
अनलाइन प्रणाली सञ्चालन गर्न वडाले आवश्यकता महसुस गरेका पूर्वाधार विकास गर्ने र कर्मचारीको क्षमता विकास गर्ने कामलाई विभागले प्राथमिकता दिएको छ । प्रणाली सञ्चालन गर्न कर्मचारीलाई अभ्यस्त गराउनुलाई विभागले प्राथमिकतामा राखेको काफ्लेको भनाइ छ ।
प्रणाली सञ्चालन गर्न सूचना प्रविधि विभागले प्रावधिक जनशक्ति उपलब्ध गराएको विभागका प्रमुख अनिरुद्र नेपालले जानकारी दिए । केन्द्रबाट सहजीकरण गर्दा हुनेलाई केन्द्रबाटै र वडामै पठाएर सहयोग गर्नु पर्नेलाई वडामै जनशक्ति पठाएर सहजीकरण भइरहेको नेपालले जानकारी दिए ।
वडामा अधिकारीहरु पुगेको बेला वडा नंं १६ का अध्यक्ष रोजिना श्रेष्ठले एकल सेवा केन्द्र सञ्चालन तयारी भइरहेको जानकारी दिँदै यो केन्द्र सञ्चालनमा आएपछि इअफिस पूर्ण कार्यान्वयनमा ल्याउने योजना रहेको बताए । वडा नं. १ का अध्यक्ष भरतलाल श्रेष्ठले बदलिँदो परिस्थितिअनुरुप सेवाप्रति जिम्मेवार रहेको बताउँदै कार्यान्वयनमा ल्याएको प्रणाली सञ्चालन गर्न कर्मचारीको दक्षता बढाउँदै जानु पर्ने धारणा राखे ।
निरीक्षणका क्रममा इअफिस प्रणालीअन्तर्गत सञ्चालन गर्नु पर्ने दर्ता, चलानी, टिप्पणी, चिठी पत्रलगायतका काम, जिन्सी शाखाले प्रयोगमा ल्याएको महालेखा परीक्षकको कार्यालयको प्रणाली पब्लिक एसेस्ट म्यानेजमेन्ट सिस्टक (पाम्स) भित्र सञ्चालन गर्नु पर्ने माग फाराम भर्ने, शिफारिस गर्ने, स्वीकृत गर्ने, खरिद आदेश दिने, दाखिला गर्ने, भुक्तानी गर्ने प्रणाली स्थिर सम्पत्ति (खप्ने सामान), नखप्ने (कापी, कलम, जस्ता नखप्ने दैनिक प्रयोगका सामान) व्यवस्थापनका विषयमा आपसी बुझाइ र कार्यान्वयनको प्राथमिकताका विषयमा संवाद भएको थियो ।
महानगरपालिकाले २०६१ सालदेखि वेभ साइट सञ्चालन गरेर आफू सम्बन्धित सूचना तथा जानकारी प्रवाह गर्न थालेको हो । २०६३ सालबाट प्रशासन विभागले कर्मचारीहरुका लागि विद्युतीय हाजिरी प्रणाली र व्यक्तिगत सूचना व्यवस्थापन प्रणाली कार्यान्वयनमा ल्याएको छ । २०६८ सालबाट व्यक्तिगत घटना दर्ता तथा सामाजिक सुरक्षा व्यवस्थापन प्रणाली (भाइटल इभेन्ट रजिष्ट्रेसन सिस्टम एण्ड सोसियल सेक्युरिटी म्यानेजमेन्ट इन्फरमेसन (भीईआरएसएस–एमआइएस) सञ्चालनमा ल्याएको छ । त्यस्तै, २०६९ सालबाट विद्युतीय नक्सा पास प्रणाली (इलेक्ट्रोनिक विल्डिङ् परमिट सिस्टम (इबिपिएस) नमूना कार्यक्रमका रुपमा सञ्चालन गरेको थियो ।
