काठमाडौँ । जिल्ला विपद् व्यवस्थापन समिति बाजुराले  भूकम्पपीडितको आवास निर्माणका लागि दोस्रो किस्ता स्थानीय तहलाई हस्तान्तरण गर्ने तयारी थालेको छ । 

प्रमुख जिल्ला अधिकारी तथा विपद् व्यवस्थापन समितिका अध्यक्ष मेघनाथ पाध्याका अनुसार गृहमन्त्रालयबाट आएको रकम पालिकालाई वितरण गर्ने निर्णय भएको छ । 

उनका अनुसार उक्त रकम १ हजार ४७३ जना भूकम्पपीडितलाई प्रदान गरिनेछ । जिल्लाका ९ पालिकामध्ये हिमाली र जगन्नाथ गाउँपालिकाको भूकम्प प्रभावितको तथ्याङ्क अद्यावधिक नभएकाले उक्त पालिकाका प्रभावितहरुका लागि भने रकम आएको छैन । 

त्रिवेणी नगरपालिकामा २८ लाख २५ हजार, बूढीगङ्गा गाउँपालिकालाई  ८६ लाख र बूढीनन्दा नगरपालिकालाई १३ लाख ५० रुपैयाँ हस्तान्तरण गरिएको छ । 

गौमूल गाउँपालिकामा १३ लाख ७५ हजार, खप्तड छेडेदहमा २ करोड २४ लाख ७५ हजार र स्वामीकार्तिक खापर गाउँपालिकालाई २ लाख २५ हजार गरी कूल तीन करोड ६८ लाख २५ हजार रकम जिल्लामा आएको छ । 

मनसुनजन्य विपद्का प्रभावितका लागि पनि रकम आइसकेको बताइएको छ । मनसुनजन्य विपद्बाट बूढीगङ्गा गाउँपालिका, त्रिवेणी नगरपालिका, गौमूल गाउँपालिकालगायतका पालिकामा उक्त रकम पठाउने तयारी छ ।