काठमाडौँ । लुम्बिनी क्षेत्रको प्रचारप्रसार गर्न भन्दै स्थानीय तहका जनप्रतिनिधिहरु अमेरिका पुगेका छन् । लुम्बिनी सर्किटका स्थानीय तह प्रमुखहरु अमेरिकाको टेक्सस पुगेका हुन् । गैरआवासीय नेपाली सङ्घ अमेरिका, पर्यटन विभागको समन्वय र सहजीकरणमा नगरप्रमुखहरुको अमेरिकाको भ्रमणमा छन् ।
भ्रमण टोलीले टेक्सस, न्यूयोर्क, भर्जिनिया, मेरिल्याण्ड र वासिङटन डिसीमा अमेरिकी तथा नेपाली समुदायका विभिन्न निकायसँग अन्तरक्रिया, छलफल गर्ने कार्यक्रम छ । टेक्सस भ्रमणमा रहेको लुम्बिनी परिपथका नगरप्रमुखहरुको टोलीले टेक्ससका राज्यसभाका सांसदहरु, स्थानीय युलेश सिटीका नगरप्रमुख तथा पदाधिकारी, नेपाली समुदायका अगुवासँग छुट्टाछट्टै अन्तरक्रिया गरेको गैरआवासीय नेपाली सङ्घ अमेरिकाका उपाध्यक्ष तथा पर्यटन विभाग प्रमुख नेत्र पाण्डेले जानकारी दिए ।
टेक्सस राज्यसभाको बैठकले नगरप्रमुखहरुको उपस्थितिमा सङ्कल्प प्रस्ताव पारित गर्दै ‘लुम्बिनी एड्भोकेसी डे’ समेत घोषणा गरेको छ ।
भगवान गौतमबुद्धको जन्मस्थल लुम्बिनीलाई अन्तरर्राष्ट्रियस्तरमा चिनाउनु भएृको बताउँदै देवदह नगरपाकिलाका प्रमुख धुव खरेलले भ्रमणका क्रममा अमेरिकाका स्थानीय नगरपालिकासँग भगिनीसम्बन्ध स्थापित गर्ने, लुम्बिनी क्षेत्रको बारेमा तयार पारिएको जानकारीमूलक सामग्री वितरण गरी अमेरिकी तथा नेपाली नागरिकलाई नेपालको बुद्धभूमि र बुद्ध परिपथका नगरपालिकाको भ्रमणका लागि निमन्त्रणा दिने जस्ता काम गरिरहको जानकारी दिएका छन् ।
कपिलवस्तु, रामग्रामसहितका नगर प्रमृुखहरु सहभागी भ्रमण टोली झण्डै एकसाता यता अमेरिकाको यात्रामा छ । रामनगर नगरपालिका प्रमुख धनपत यादवले अमेरिका भ्रमणबाट आफुहरु उत्साहित भएको बताउँदै गौतमबुद्धको जन्मस्थल लुम्बिनीको थप प्रचारप्रसार गर्न सहयोग पुगेको छ ।
