काठमाडौँ । प्युठानको झिमरुक गाउँपालिकाले किसान र अनौपचारिक क्षेत्रका श्रमिकको सामाजिक सुरक्षा कार्यक्रम सुरु गरेको छ ।

अनौपचारिक क्षेत्रमा कार्यरत श्रमिकको सामाजिक सुरक्षा कार्यक्रम संचालन गर्न गाउँपालिकाले बजेट हालेर कार्यक्रम सुरु गरेको हो । पालिकाले चैत ४ गते सार्वजनिक सुचना प्रकाशित गरेर सामाजिक सुरक्षा कार्यक्रममा सहभागी हुनको लागि किसान र अनौपचारिक क्षेत्रका श्रमिकलाई अव्हान गरेको छ ।

गाउँपालिकाले सामाजिक सुरक्षा कोषसँग सम्झौता गरी अनौपचारिक क्षेत्रका श्रमिकको लागि सामाजिक सुरक्षा कार्यविधि अनुसार कोषमा आवद्ध गराउन लागेको हो । गाउँपालिकाले पहिलो चरणमा ४० जना किसान तथा अनौपचारिक क्षेत्रका श्रमिकलाई कोषमा आवद्ध गराउने लक्ष्य लिएको छ ।

सो गाउँपालिकामा अनौचापरिक क्षेत्रमा कार्यरत श्रमिक र किसानको संख्या धेरै भएकोले यी दुबै क्षेत्रमा कार्यरत श्रमिकलाई समावेश गर्न लागिएको गाउँपालिकको कृषि अधिकृत तृसना जिसीले जानकारी दिइन् ।

‘हाम्रो पालिकाभित्र किसान र अनौपचारिक क्षेत्रका श्रमिकको संख्या ठूलो छ । उहाँहरुलाई सामाजिक सुरक्षा कार्यक्रम जरुरी छ । त्यसैले सामाजिक सुरक्षा कोषसँग सम्झौता गरेर हामीले चालु आर्थिक वर्षदेखि नै यो कार्यक्रम संचालनको लागि सार्वजनिक सुचना प्रकाशन गरिसकेका छौं,’ कृषि अधिकृत जिसीले वडापालिकासँग भनिन् ।

सो कार्यक्रमका लागि गाउँपालिकाले चालु आर्थिक वर्षमा ५ लाख रुपैयाँ बजेट विनियोजन गरेको छ । 

गाउँपालिकाले श्रमिकको न्यूनतम ज्याला मासिक १० हजार ८२० रुपैयाँलाई आधार मानेर त्यसमा रोजगारदाताले जम्मा गर्नुपर्ने रकम आफैले दिन लागेको हो । अनौपचारिक क्षेत्रका श्रमिकको लागि मासिक न्युनतम पारिश्रमिकको ११ प्रतिशत रकम सम्बन्धित व्यक्ति र ९.३७ प्रतिशत रकम गाउँपालिकाले दिन लागिएको छ ।

गाउँपालिकाले यसको लागि कार्यविधि नै बनाएको छ । सो कार्यविधि अनुसार कम्तिमा ३ वर्षदेखि कृषि क्षेत्रमा लागेका किसानलाई गाउँपालिकाले रकम उपलब्ध गराउने छ । यो कार्यक्रम कम्तिमा २ वर्ष संचालन गर्ने र त्यसमा जनसहभागिता र उपलब्धिको समीक्षा गर्दै थप निर्णय गरिने गाउँपालिकाले जानकारी दिएको छ ।

सम्बन्धित समाचार 

७ स्थानीय तह किन भए सामाजिक सुरक्षा कोषमा आवद्ध ? के पाउँछन् ती पालिकाका जनताले ?