काठमाडौँ । उदयपुरको त्रियुगा नगरपालिकाले ‘मेयरसँग जेष्ठ नागरिक स्वास्थ्य प्रवद्र्धन’ कार्यक्रम सञ्चालनमा ल्याएको छ । वडा नं १ जोगीदहबाट शुभारम्भ गरिएको उक्त कार्यक्रम नगरपालिकाका १६ वटै वडामा सञ्चालन गरिने नगरप्रमुख बसन्तकुमार बस्नेतले बताए । 

वडा नं ३ मोतिगडाको स्वास्थ्य चौकीमा आयोजित ज्येष्ठ  नागरिकहरुको स्वास्थ्य सेवा शिविरको उद्घाटन गर्दै नगर प्रमुख बस्नेतले राष्ट्रको सम्पत्ति र अनुभवका खानीका रुपमा रहेका  ज्येष्ठ नागरिकहरु सामान्य स्वास्थ्य उपचारबाट वञ्चित हुनु नपरोस् भन्ने उद्देश्यले जेष्ठ नागरिक लक्षित स्वास्थ्य कार्यक्रम सञ्चालनमा ल्याइएको बताए ।

नगरपालिकाका ज्येष्ठ नागरिकहरुलाई स्वास्थ्य सम्बन्धी के कस्तो समस्या छ र नगरपालिकाले उनीहरुको स्वास्थ्य उपचारमा सहजीकरण गर्न के कस्तो योजना ल्याउनुपर्छ भन्ने जानकारी लिन पनि यो कार्यक्रम प्रभावकारी हुने देखिएकाले मेयरसँग जेष्ठ नागरिक स्वास्थ कार्यक्रम सुरु गरिएको नगरप्रमुख बस्नेत बताउँछन् । 

कार्यक्रम अन्तर्गत नगरपालिकाका ज्येष्ठ नागरिक, अशक्त, अपांगता भएकाको घरघरमा पुगेर स्वास्थ्य परीक्षण गरिने छ । नगरभित्रका सामाजिक सुरक्षा भत्ता लिने ९ हजार बढी नागरिकलाई घरदैलोमा पुगेर मधुमेह, उच्च रक्तचाप, क्षयरोग, सुगर, अक्सिजन लेभल, मुटु सम्बन्धी चेक जाँच, मिर्गौला सम्बन्धी चेकजाँच लगायतका सेवाहरु निःशुल्क प्रदान गरिने शाखाका स्वास्थ्य अधिकृत उपेन्द्र कार्कीले बताए।