काठमाडौँ । विगत ५ महिनादेखि तलव नपाएपछि काठमाडोँ महानगरपालिकाभित्र कार्यरत शिक्षकहरुले मेयरको ध्यानाकर्षण गराएका छन् ।
उनीहरुले मेयर बालेन शाहलाई पत्र लेख्दै तलव उपलव्ध गराउन भनेका छन् । कोठा भाडा तिर्न र खान समेत समस्या भएको भन्दै उनीहरुले तलव ततकाल उपलव्ध गराउने व्यवस्था मिलाउन भनेका छन् ।
मेयर वालेनले प्रमुख प्रशासकीय अधिृकत नहुँदा सफाई कर्मचारीले तलव नपाएको भन्दै असहयोग गर्नेलाई टुकुचामा गाड्ने अभिव्यीक्त दिएलगत्तै शिक्षकहरु पनि तलव माग्दै महानगर पुगेका हुन् ।
करिब तीन महिनादेखि महानगर प्रमुख प्रशासकीय अधिकृतबिहीन छ । निमित्तले समेत आर्थिक अधिकार नपाएका कारण महानगरका सबै आर्थिक गतिविधि ठप्प छन् । प्रमुख प्रशासकीय अधिकृत सरोज गुरागाईं काठमाडौँ टावरको नक्सापास विवादमा मुछिएपछि कार्यालयमा अनुपस्थित छन् ।
तीन महिनादेखि नै महानगरका मेयर बालेन, उपमेयर सुनिता डंगोलसहित तीन हजार ६०० कर्मचारीले पनि तलव र सुविधा पाएका छैनन् ।
महानगरका कर्मचारीमध्ये ७०० भन्दा बढी शिक्षक छन् । भोको पेटले विद्यार्थी पढाउन नसकिने भन्दै शिक्षकहरूले चाँडै तलब पाउने व्यवस्था गरिदिन आग्रह गरेका छन् ।
तलबविना भोको पेटले शिक्षकहरूले नियमित कार्यसम्पादन गर्नसमेत नसक्ने अवस्था आएको महानगर समितिले जनाएको छ । विद्यालयको दैनिक प्रशासन सञ्चालनमा असर पुगेकाले सम्पूर्ण भुक्तानी गर्ने व्यवस्था मिलादिन शिक्षकहरूले आग्रह गरेका छन् । उनीहरूले उपमेयर सुनिता डंगोलको पनि ध्यानाकर्षण गराएका छन् ।
पुस ८ देखि बिदामा बसेका प्रमुख प्शासकयि अधिकृत गुरागाईँले त्यसयता हाजिर गर्न सकेका छैनन् । बिदा सकिएपछि गुरागाईं कार्यालय हाजिर हुन खोज्दा महानगरले उनको कार्यकक्षमा ताला लगाइदिएको थियो । हाल महानगरका निमित्त प्रमुख प्रशासकीय अधिकृतमा नुरनिधि न्यौपाने छन् । न्यौपानेलाई आर्थिक अधिकार दिन बालेनले मन्त्रालयलाई अनुरोध गर्दै पत्र पठाउँदा पनि सरकारले अनुमति दिएको छैन ।
