काठमाडौँ । काठमाडौँको तिनकुने, कोटेश्वर र सिनामंगल क्षेत्रमा सरकारले कर्फ्यु लगाएपछि राजावादी प्रर्दशनकारीहरुको समूहले काठमाडौँ र भक्तपुरको सीमामा रहेको जडिवुटी उत्पादन तथा प्रशोधन केन्द्रमा आगजनी गरेका छन् ।
आन्दोलनले उग्ररुप लिएपछि प्रशासनले आज राति १० बजेसम्मका लागि यी क्षेत्रमा प्रदर्शन गर्न रोक लगाएपछि तितरवितर भएका प्रदर्शनकारीले जडिवुटी पुगेर सञ्चोेलगायतका जडिवुटी उत्पादन गर्ने कम्पनीमा आगजनी गरेका हुन् ।
उग्र बनेका प्रदर्शनकारीले कार्यालय परिसरमा रहेका केही सवारीसाधन समेत जलाइदिएका छन् । तिनकुनेमा निस्किएका राजावादी समर्थकले प्रहरी घेराबन्दी तोड्न खोजेपछि सुरु भएको झडपले उग्ररुप लिदै गएपछि सो क्षेत्रमा आन्दोलनकारीहरुले ढुंगामुढा र तोडफोड गरेका छन् ।
उता प्रदर्शनबाट तितरवितर भएका प्रदर्शनकारीले नेकपा माओवादी केन्द्र र च्यासलमा रहेको नेकपा एमालेको पार्टी कार्यालयसमेत तोडफोड गर्ने भन्दै उत्तेजित बनेपछि यी दुबै पार्टी कार्यालयको सुरक्षा व्यवस्था बढाइएको छ ।
सुरुमा एउटा निजी घरमा आगलागी र तोडफोड गरेका आन्दोलनकारीले सुविधानगरमा रहेको नेकपा एकीकृत समाजवादीको पार्टी कार्यालय तोडफोड र आगजनी गरेका छन् ।
उनीहरुले अन्नपूर्ण पोष्ट दैनिकको कार्यलयमा समेत क्षति पुुर्याएका छन् । कोटेश्वरको भाटभटेनी सुपरमार्केटलगायतका स्थानमा समेत आगजनी भएपछि प्रशासनले भीड र अराजकता नियन्त्रण गर्न निशेधाज्ञा जारी गरिसकेको छ ।
