काठमाडौँ । काठमाडौँ महानगरपालिकाले शुक्रवार काठमाडौँको तीनकुने, सिनामंगल, कोटेश्वर, जडिवुटीलगायतका क्षेत्रमा भएका हिंसात्मक घटनामा तत्कालीन राजा ज्ञानेन्द्र शाहलाई जिम्मेवार ठहर गरेको छ ।
काठमाडौं महानगरपालिकाले ज्ञानेन्द्र शाहलाई सम्बोधन गर्दै शुक्रवार भएको प्रदर्शनमा फोहोर गरेको भन्दै ७ लाख ९३ हजार रुपैयाँ जरिमाना तोकेको छ ।
विभिन्न ७ वटा पत्र काटेर महानगरले ज्ञानेन्द्रलाई जरिमाना तिर्न भन्दै निर्मल निवासमा पत्र पठाएको छ । महानगरपालिकाले काठमाडौँ महानगरपालिकाभित्र सभा, जुलुसका नाममा फोहोर गर्ने आयोजकलाइ जरिमाना तोक्दै आएको छ ।
राजावादीहरुले तीनकुनेमा प्रदर्शन गर्दा तोडफोड र लुटपाट गरेको सबै मूल्यांकन गरेर विभिन्न शीर्षकमा महानगरले जरिमाना तोकेको छ । राजावादीहरुको हिजो काठमाडौंमा भएको प्रदर्शन पूर्वराजा शाहकै निर्देशनमा भएको भन्दै महानगरले निर्मल निवासलाई नै पत्र काटेको हो ।महानगरले हिजो नै काठमाडौंमा कार्यक्रम गरेको समाजवादी मोर्चालाई भने कुनै जरिमामना तोकेको छैन ।
