काठमाडौँ । नेपालको इतिहासमै पहिलोपटक इलामको सूर्योदय नगरपालिकाले चियाबालीको बीमा गरेको छ ।
सूर्योदय नगरपालिकाका मेयर रनबहादुर राईका अनुसार वडा नम्बर ८ मा पहिलोपटक चियाबालीको बीमा गरिएको छ । उनले चिया वाली बीमा सूर्योदय नगरपालिका बडा नम्बर ८ ले इतिहास बनाएको दाबी गरेका छन् ।
सूर्योदय नगरपालिकाको वडा नम्बर ८ बाट चिया वाली बीमा प्रारम्भ भएको उनको भनाइ छ । बीमा प्रदायक संस्थाका अनुसार यो नेपालको पहिलो अभ्यास हो ।
कुनै पनि प्रकारको वालीमा हुने सक्ने सम्भावित जोखिम र विपदहरूबाट किसानहरूलाई बचाउन यो अभियान सुरु गरेको मेयर राइको भनाइ छ । नगरपालिकाले २०८०/०८१ बाट नै बाली बीमा सुरु गरे पनि पहिलोपटक चियबालीको बीमा गरिएको हो ।
चिया तथा कफी विकास बोर्डको समन्वयमा नेशनल चिया कारखानाले ६० घरधूरी किसानहरूलाई निःशुल्क बीमा गरिदिएको छ ।
मेयरका अनुसार एकैदिन १०० भन्दा बढी चिया किसानहरूको बीमा गरिएको छ । अर्गानिक चिया उत्पादन संगै बीमालाई जोडेर लैजान नगरपालिकाको प्रयास सफल भएको मेयरको भनाइ छ ।
