काठमाडौँ । काठमाडौँ महानगरका प्रमुख प्रशासकीय अधिकृत सरोज गुरागाईंलाई हाजिर गराउने कि नगराउने विवाद भइरहेको बेलामा उपमेयर सुनिता डंगोलको कुटनीतिक जवाफ आएको छ ।
मेयर बालेन्द्र शाहले प्रमुख प्रशासकीय अधिकृत गुरागाईंलाई हाजिर गर्न नदिने भन्दै प्रमुख प्रशासकीय अधिकृतको कार्यकक्ष बाहिर नगर प्रहरी तैनाथ गराएका छन् । तर, प्रमुख प्रशासकीय अधिकृत गुरागाईंलाई हाजिर गराउने भन्दै महानगरका कर्मचारी र वडाध्यक्षहरु उनको स्वागतमा महानगर छिर्ने गेटमा बसेका छन् ।
बागबजारमा रहेको पुरानो बसपार्कमा बनिरहेको काठमाडौँ भ्यू टावरको नक्सापासमा प्रमुख प्रशासकीय अधिकृत गुरागाईंले गलत गरेको भन्दै मेयर शाहले उनलाई महानगर प्रवेशमा रोक लगाएका हुन् । तर, सो प्रकरणमा प्रमुख प्रशासकीय अधिकृत गुरागाईंको संलग्नता नदेखिएको भन्दै कर्मचारी र वडाध्यक्षहरुले उनलाई स्वागत गर्ने तयारी गरेका हुन् ।
यो प्रकरणमा औपचारिक रुपमा मुख नखोलीको उपमेयर सुनिता डंगोलले वडापालिकासँगको प्रत्यक्ष सम्पर्कमा आउन चाहिनन् । वडापालिकाले उपमेयर डंगोलको मोबाइल नम्बर सम्पर्क गरी प्रमुख प्रशासकीय अधिकृत गुरागाईंलाई हाजिर गराउने सन्दर्भमा उपमेयरज्यूको धारणा के हो भनेर सोधेका थियौं ।
हामीले गरेको टेलिफोन उपमेयर डंगोलका स्वकीय सचिवले उठाए । र, उनले कुटनीतिक जवाफ दिए
‘उहाँ (उपमेयर डंगोल) अहिले व्यस्त हुनुभएकोले मैले फोन उठाएको हो । हामी अहिले अफिस (महानगर) मै छौं । प्रमुख प्रशासकीय अधिकृत अहिले हाजिर गर्न आउने भन्ने छ,’ उपमेयर डंगोलका स्वकीय सचिवले वडापालिकासँग भने ।
प्रमुख प्रशासकीय अधिकृतलाई हाजिर गर्न दिने नदिने विषयमा उपमयेयरज्यूको धारणा के हो भन्ने वडापालिकाको प्रश्नमा उनले भने– बाहिर जे हो, त्यै हो ।
महानगरको गेट बाहिर प्रमुख प्रशासकीय अधिकृत गुरागाईंलाई स्वागत गर्ने टोली उपस्थित छ ।
