काठमाडौँ । काठमाडौँ महानगरका मेयर बालेन साहको निर्देशनमा कार्यकक्षको मुल ढोकामा पुगेका प्रमुख प्रशासकीय अधिकृत सरोज गुरागाईलाई नगर प्रहरीले बाहिर निकालेपछि उपमेयर सुनिता डंगोलले चर्को असन्तुष्टि जनाएकी छन् ।
कर्मचारीले जर्वजस्त गुरागाईको कार्यकक्षको भित्री ढोका फोरेर कार्यकक्षमा बसाउन खोजेपछि मेयरले नगर प्रहरी परिचालन गरेर गुरागाईलाई बाहिर निकालेका थिए ।
नगर प्रहरीको अवरोध छिचोल्दै प्रमुख प्रशासकीय अधिकृतलाई उनको कार्यकक्षमा पुर्याएपछि नगरप्रहरी प्रमुख राजुनाथ पाण्डे नेतृत्वको टिमले अवरोध गरेको थियो ।
कार्यकक्षामा स्वागत गर्न आइपुगेकी उपमेयर सुनिता डंगोलकै अघि मेयरको मौखिक आदेश भन्दै नगर प्रहरीले गुरागाइँलाइृक ार्यकक्षबाट बाहिर निकालेपछि डंगोल गुरागाई, वडाध्यक्षहरु र कर्मचारीसँग अनौपचारिक छलफलमा जुटिन् ।
छलफलका क्रममा उनले मेयर साहको कदमको आलोचना गरेकी छन् । लामो समयदेखि कर्मचारीले तलब खान नपाएको, क्यान्सरको उपचार गराइरहेका बिरामीलाई समेत सहयोग गर्न नपाएको भन्दै डंगोलले अधिकृतलाई काम गर्न दिनुपर्ने धारणा राखिन ।
महानगरले हालसम्म गुरागाइँलाई दोषी देखिनसकेको भन्दै उनले दोषी भए कारवाही हुनुपर्ने तर अल्झाएर राख्न नहुने धारणा राखिन् ।
उनले मेयरले कार्यकक्षमा बसेर नगर प्रहरी परिचालन गरेर समस्या समाधान भन्दा झन बल्झाउने कोशिस गरेको भन्दै लुकेर होइन खुलेर छलफलमा जुट्न बालेनलाई आग्रह पनि गरिन् ।
मेयरले रोक्न आदेश दिएको भए मेयर अघि देखिनुपर्ने भन्दै उनले छलफलमा भनिन्, ‘यसरी लुकेर समस्या समाधान हुँदैन आउनुस मैदानमै भिडेर समस्या समाधान गरौँ ।’
