काठमाडौँ । प्रमुख प्रशासकीय अधिकृत सरोज गुरागाईंलाई हाजिर गर्न दिने कि नदिने भन्ने विवादले अहिले काठमाडौँ महानगरपालिका देशभर चासोको केन्द्रमा छ ।
महानगरका उपमेयर सुनिता डंगोल, वडाध्यक्षसहितका जनप्रतिनिधि र कर्मचारीहरु प्रमुख प्रशासकीय अधिकृत गुरागाईंलाई कार्यालयमा हाजिर गराउन सबै प्रकारले सक्रिय भएका छन् भने मेयर बालेन्द्र शाह तथा महानगर प्रहरी भने उनलाई रोक्न सबै प्रकारको प्रयास गरिरहेका छन् ।
सबैको चासोको केन्द्र भएपनि काठमाडौँ महानगरकै १६ नं. वडाका वडाध्यक्ष रोजिना श्रेष्ठ भने महानगरमा भएको गतिविधिबारे ‘बेखबर’ रहेकी छिन् । स्थानीय तह उपनिर्वाचनमा राष्ट्रिय स्वतन्त्र पार्टीबाट उम्मेदवार बनी विजयी भएकी श्रेष्ठले आफूलाई आजको कार्यक्रम बारे कसैले जानकारी नदिएको बताइन् ।
‘म अहिले वडा कार्यालयमै छु । धेरैतिरबाट फोन आइरहेको छ । आजको कार्यक्रमबारे मलाई कसैले पनि जानकारी गराएन । मैले त भर्खर पो जानकारी पाउँदैछु,’ अन्य वडाका वडाध्यक्ष र जनप्रतिनिधिहरु प्रमुख प्रशासकीय अधिकृतको स्वागतका लागि महानगर पुग्दा तपाईं किन नजानु भएको भन्ने वडापालिकाको प्रश्नमा वडाध्यक्ष श्रेष्ठले भनिन् ।
पहिला जानकारी पाएको भए पनि आफू सहभागी हुनेमा उनले संशय व्यक्त गरिन् ।
‘यो वडा निकै ठूलो छ । धेरै काम पर्छ । जानै पर्ने भए त जाने थिएँ तर, सितिमिति निस्कन पाउदिनँ,’ पहिला नै जानकारी पाएको भए जानु हुन्थ्यो कि के गर्नुहुन्थ्यो भन्ने वडापालिकाको अर्काे प्रश्नमा उनले भनिन् ।
