काठमाडौँ । काठमाडौँ महानगरपालिकाको तनाव कम भएको छैन । मेयर बालेन्द्र शाहको अडान विपरित प्रमुख प्रशासकीय अधिकृत सरोज गुरागाईंले महानगरमा हाजिर गरेका छन् ।
उपमेयर सुनिता डंगोल, वडाध्यक्षहरु तथा महानगरका कर्मचारीको सहयोगमा प्रमुख प्रशासकीय अधिकृत गुरागाईं महानगर छिरेर हाजिर गर्न सफल भएका हुन् । यद्यपि, उनलाई कार्यकक्ष प्रवेश नदिने महानगर प्रहरीले सक्दो प्रयास भने गरेको थियो ।
प्रमुख प्रशासकीय अधिकृत गुरागाईं महानगर प्रवेश गरेपछि उपमेयर डंगोल सहित वडाध्यक्षहरु सहभागी भएर छलफल भएको थियो । सो छलफलमा प्रमुख प्रशासकीय अधिकृत गुरागाईं पनि सहभागी भए ।
सो छलफलपछि प्रमुख प्रशासकीय अधिकृत गुरागाईंले महानगरमा हाजिर गरेका छन् । हाजिर गरेपछि उनी संघीय मामिला तथा सामान्य प्रशासन मन्त्रालय गएका छन् ।
तर, काठमाडौँ महानगर प्रहरीले प्रमुख प्रशासकीय अधिकृत गुरागाईंले प्रयोग गर्ने गाडीमा ह्वील लक गरिदिएको थियो । सोही कारण प्रमुख प्रशासकीय अधिकृत गुरागाईं महानगरकै वातावरण व्यवस्थापन विभागको फोहोरमैला अनुगमन तथा निरीक्षणमा प्रयोग गरिने सवारी साधन चढेर मन्त्रालय गएका हुन् ।
