काठमाडौँ । राष्ट्रपति रामचन्द्र पौडेलले संविधान दिवसका अवसरमा ६७० जना कैदीबन्दीको कैद माफी मिनाहा गरेका छन् ।
मन्त्रिपरिषद्को सिफारिसमा उक्त कैदीहरुको भुक्तान गर्न बाँकी कैद राष्ट्रपतिले मिनाहा गरेका हुन् । उनले फौजदारी कसुर (सजाय निर्धारण तथा कार्यान्वयन) ऐन, कारागार नियमावली, सर्वोच्च अदालतको रिट र ज्येष्ठ नागरिक ऐनका आधारमा ६७० जना कैदीको भुक्तान हुन बाँकी कैद माफी मिनाहा गरेको राष्ट्रपतिको कार्यालयले जनाएको छ ।
पौडेलले मन्त्रिपरिषद्को गत भदौ २९ गतेको बैठकको सिफारिसअनुसार आजबाट लागू हुनेगरी उनीहरुलाई माफी मिनाहा गरेको राष्ट्रपति कार्यालयले जारी विज्ञप्तिमा उल्लेख छ ।
संविधान दिवसको खुसीयालीमा जेल जीवन बिताइरहेका र जेलमा असल चालचन देखिएकालाई सरकारको सिफारिसमा राष्ट्रपतिले कैद माफी दिने प्रचलन र कानुन छ ।
राजतन्त्रातमक व्यवस्थामा राजाको जनमदिनमा समते यस्तो कैद माफी दिइन्थ्यो । तर गणतन्त्र आएपछि पनि अपराधमा सजाय काटिरहेकाहरुलाई निश्चित मापदण्ड बनाएर छुटाउने चलनले निरन्तरता पाएको छ ।
पछिल्ला समय भने राजनीतिक दलहरुले दलीय आस्थाको आधारमा समेत गम्भीर अपराधमा संलग्नको पनि कैद माफी मिनाहा सिफारिस गर्न थालेका कारण यो प्रकृया विवादमा छ ।
