काठमाडौं । नेपालमा महामारीको रुप लिदै गरेको गाई–भैँसीमा लाग्ने रोग लम्पी स्किन तत्काल नियन्त्रणमा ल्याउन नसकिए देशले ठूलो आर्थिक क्षति व्यहोर्नुपर्ने देखिएको छ ।
नेपाली अर्थतन्त्रको साढे ११ प्रतिशत हिस्सा राख्ने पशुपालन क्षेत्र लम्पी स्किनलगायतका संक्रामक रोगका कारण यतिबेला संकटग्रस्त छ ।
देशका ७१ जिल्लामा फैलिइसकेको यो रोगका कारण हालसम्म २७ अर्ब २२ करोड ५० लाख रुपैयाँ बराबरको क्षति भइसकेको नेपाल पशु चिकित्सा परिषदले जनाएको छ ।
परिषदले यही रफ्तारमा रोगको संक्रमण फैलिने हो भने चालु आर्थिक वर्षको कुल बजेटको ७.२ प्रतिशत रकम बरावरको क्षति हुने आंकलन गरेको छ ।
संक्रमणका कारण गाई–भैँसीको मृत्युका कारण यति धेरै क्षति हुने उसको दाबी छ । परिषदका अनुसार महामारी नियन्त्रणमा नआए र यही गतिमा संक्रमण कायम रहे यो आर्थिक वर्षमा २५ लाख २६ हजार पशुमा संक्रमण फैलिने छ ।
यो रोग लागेपछि हुने मृत्युदर हाल ३.८ प्रतिशत छ । परिषदले एउटा पशुको मृत्यु हुँदा कृषकलाई सरदर ४९ हजार १३५ रुपैयाँको क्षति भइरहेको छ ।
‘यही अनुपातमा संक्रमित पशुको मृत्यु भएको अवस्थामा १ लाख गाई–भैँसी मर्छन । त्यो भनेको १ खर्ब २६ अर्बको क्षति हो,’ परिषदले सरकारलाई १ महिना अघि नै बुझाएको ध्यानाकर्षणहितको सुझाव प्रतिवेदनमा भनिएको छ । यो क्षति आर्थिक वर्ष २०८०/०८१ को कुल बजेटको ७.२ प्रतिशतहुने सुझाव पत्रमा उल्लेख छ ।
पशु चिकित्सक अभावकै कारण नेपालको दीगो विकास लक्ष्य र सरकारले प्रक्षेपण गरेको ६ प्रतिशत आर्थिक बृद्धिको लक्ष्यमा समेत गम्भीर असर पर्न सक्ने चिकित्सक तथा अर्थविद्हरुले चेतावनी दिएको छन् ।
