काठमाडौँ । आज विश्व रेबिजविरुद्धको दिवस नेपालमा पनि विभिन्न कार्यक्रम गरी मनाइँदै छ ।
हरेक वर्ष सेप्टेम्बर २८ लाई विश्व रेबिज दिवसको रुपमा मनाउने गरिन्छ । रेबिज रोकथाम र यस रोगविरुद्धमा भइरहेको प्रगतिको जागरुकता जगाउने उद्धेश्यले मनाइन्छ ।
ग्लोबल एलायन्स फर रेबिज कन्ट्रोलले सन् २००७ देखि विश्व रेबिजविरुद्धको दिवसको रुपमा मनाउन थालेको थियो । नेपालले सन् २०३० सम्म रेबिजलाई शून्यमा झार्ने लक्ष्य लिएको छ ।
तर इपिडिमियोलोजी तथा रोग नियन्त्रण महाशाखाको गत आर्थिक वर्ष २०७९/ ८० को तथ्याङ्कअनुसार कुकुरको टोकाइबाट ७५ हजार ५६२ जना र ९ हजार ९२१ जना अन्य जनावरको टोकाइबाट बिरामी भएका थिए ।
यस्तै आव २०७५/ ७६ मा ३२ हजार ८८२ जनालाई कुकुरले टोकेको थियो । यो संख्या क्रमशः बढ्दै गएर आव ०७७/७८ मा ५४ हजार ९९६ जना पुगेको थियो ।
रेबिज एक घातक भाइरल सङ्क्रमण हो, यसलाई न्यूरोट्रोपीक भाइरस भनिन्छ । जुन छाडा कुकुर, स्याल, चमेरो, न्याउरी मुसो, बाघ, चितुवा र बिरालोजस्ता सङ्क्रमित जनावरको टोकाइबाट सर्छ ।
