काठमाडौँ । प्रस्तावित संघीय निजामति सेवा विधेयकका प्रावधानप्रति असन्तुष्टि जनाउँदै स्थानीय तहका कर्मचारीले जारी राखेको आन्दोलनका कारण देशभरका स्थानीय तहका कामकाज ठप्प भएका छन् ।
कर्मचारीहरुले काठमाडौँमा विरोध जुलसु र धर्ना जारी राखेका छन भने सबै स्थानीय तहमा पेन डाउन गरेका छन् ।
कर्मचारी आन्दोलनका कारण काम प्रभावित हुँदै गएपछि देशभरका अधिकांश स्थानीय तहका प्रमुख प्रशासकीय अधिकृतहरुले संघीय मामिला तथा सामान्य प्रशासन मन्त्रालयका सचिवलाई पत्र लेख्दै वार्ता गरेर समस्याको समाधान गर्न र आन्दोलित कर्मचारीलाई काममा फर्कने बातावरण बनाइदिन आग्रह गरेका छन् ।
प्रशासकीय अधिकृतहरुले कर्मचारीको पेन डाउनका कारण पालिकाका सेवाग्राहीलाइ मर्का परेको भन्दै आन्दोलनरत कर्मचारीका माग सम्वोधन गरी काममा फर्कने वातावरण बनाउन भनेका हुन् ।
उता आन्दोलनरत कर्मचारी संघर्ष समितिका संयोजक दिपक गौतमका अनुसार सोमवार र मंगलवार निर्णायक आन्दोलन गर्ने भन्दै देशभरका स्थानीय तहका कर्मचारीलाई काठमाडौँ बोलाइएको बताएका छन् ।
उनले सरकारले अनौपचारिक बार्ताको प्रस्ताव गरेपनि अहिलेसम्म औपचारिक रुपमा वार्तामा नबोलाएको भन्दै आन्दोलन थप शसक्त बनाउने तयारी गरेको बताए ।
उता कर्मचारी आन्दोलनले सेवाग्राहीलाई समस्या पर्न थालेपछि नेपाल नगरपालिका संघ र गाउँपालिका राष्ट्रिय महासंघले विज्ञप्तिमार्फत कमचारीको जायज माग वार्ताका माध्यमबाट सुनुवाई गर्न र कर्मचारीलाई काममा फर्कने वातावरण मिलाउन सरकारसँग आग्रह गरेका छन् ।
कर्मचारीहरुले आजपनि काठमाडौंँ केन्द्रीत धर्ना जारी राखेका छन् भने देशभरका स्थानीय तहमा पेन डाउनलाई निरन्तरता दिने जनाएका छन् ।
