काठमाडौँ । संघीय निजामति सेवा विधेयकका प्रावधानप्रति असन्तुष्टि जनाउँदै कर्मचारीले सेवा प्रवाह ठप्प पारेको भन्दै नवलपरासीको कावासोती नगरपालिकाका मेयर विष्णुप्रसाद भुषालले काममा फर्कन निर्देशन दिएका छन् ।
आज उनले विज्ञप्ति जारी गर्दै आन्दोलनका कारण सर्वसाधारणको सेवा प्रवाहमा असर परेको भन्दै कर्मचारीलाई काममा फर्कन निर्देशन दिएका छन् ।
पालिकाको विकास निर्माण रकम भुक्तानी घटना दर्तालगायतका काममा असर परेको भन्दै उनले काममा फर्कन निर्देशन दिएका हुन् ।
पालिकाका कर्मचारीहरु भने कार्यालयमा धर्नामा बसेका छन् । कर्मचारीले आन्दोलन थालेपछि प्रमुख प्रशासकीय अधिकृतले नगरपालिकाले लिने भएको पशु चिकित्सक, अमिन र सर्वेक्षकको मौखिक परीक्षा अर्को सूचना जारी नभएसम्मका लागि स्थगित गरेका थिए ।
प्रशासकीय अधिकृत भूपेन्द्र पाण्डेयले २४ देखि २६ असोजसम्मका लागि निर्धारण गरिएको परीक्षालाई गत २१ असोजमै सूचना प्रकाशित गरी स्थगित गरेका थिए ।
कर्मचारी आन्दोलनमा एक्यवद्धता जनाउदै कर्मचारी भर्ना प्रक्रिया रोकेको भन्दै मेयरले कर्मचारीलाई काममा फर्कन निर्देशन दिएका हुन् ।
